Եվրոպայի խորհրդի ոստիկանության և ազատությունից զրկման վայրերում համագործակցության ստորաբաժանման ծրագրի համակարգող Մարյանա Պապան Քրեակատարողական ծառայության պետ Ծովինար Թադևոսյանի և ԵԽ երևանյան գրասենյակի ներկայացուցիչ Դիանա Ղազարյանի ուղեկցությամբ շրջայց է կատարել «Սևան» քրեակատարողական հիմնարկում՝ ծանոթանալու Եվրոպայի խորհրդի աջակցությամբ իրականացված ծրագրերի արդյունքներին։

Շրջայցի ընթացքում Մարյանա Պապան այցելել է ԵԽ ֆինանսավորմամբ հիմնված կահույքագործության և զոդման ուսումնաարտադրական կենտրոնները, որոնք հագեցած են ժամանակակից սարքավորումներով, հաստոցներով և անհրաժեշտ բոլոր պարագաներով։ Կենտրոններն ապահովում են ազատազրկված անձանց աշխատանքային զբաղվածությունը, նպաստում մասնագիտական նոր հմտությունների ձեռքբերմանը, ինչպես նաև վերասոցիալականացման գործընթացին։

Ներկայացվել են նաև պետական միջոցներով և համագործակցության այլ  շրջանակներում ստեղծված դատապարտյալների կրթական գործընթացների, մասնավորապես հանրակրթական և տեղեկատվական տեխնոլոգիաների ոլորտի դասասենյակները։

Մարյանա Պապան նշել է նման ծրագրերի իրականացման կարևորությունն ազատազրկված անձանց վերաինտեգրման գործընթացում՝ ընդգծելով, որ ստացված արդյունքների հիման վրա նախանշվում են անհրաժեշտ ուղղությունները և համատեղ մշակվում հետագա անելիքները։

Իր հերթին Ծովինար Թադևոսյանը ներկայացրել է համակարգի առկա կարիքները, մասնավորապես՝

• Ուսումնաարտադրական տարածքների հիմնումն այլ քրեակատարողական հիմնարկներում ևս՝ հաշվի առնելով, որ նման հնարավորություններ արդեն առկա են «Սևան», «Վանաձոր» և «Արթիկ» քրեակատարողական հիմնարկներում։
• Աշխատակիցների վերապատրաստումները միջազգային փորձի և նորարարական մոտեցումների համատեքստում, որոնք առնչվում են՝
• պայմանական վաղաժամկետ ազատման գործընթացների լավարկմանը,
• վերասոցիալականացման անհատական պլանների ճիշտ կազմմանը և արդյունավետ իրականացմանը, որոնք ենթադրում են ռիսկերի կանխարգելման, ինչպես նաև ազատազրկված անձանց կարիքների և հմտությունների ճշգրիտ գնահատման մեխանիզմների կատարելագործում,
• ինքնասպանությունների կանխարգելմանը՝ ազատազրկված անձանց վարքագծի ճանաչման և պատշաճ արձագանքման հմտությունների զարգացման նպատակով,
• արդյունավետ հաղորդակցման կարողությունների ամրապնդմանը,
• կախվածությունների հաղթահարման ոլորտում կարողությունների զարգացմանը։